170916 Canón do Sil - Santa Cristina

 Canón do Sil – Santa Cristina  (PR – G – 98)

                                                                     Enlaces a:  wikiloc  / fotos  /  pdf castelán

SITUACIÓN: Parada de Sil (Ourense)

PUNTO DE PARTIDA: Praza do Barquilleiro (665 m)

ACCESO: Desde Ourense pola estrada OU-536 ata Vilariño Frío; alí coller pola OU-0604 ata Parada de Sil.

HORARIO: 6/7 horas          DESNIVÉIS: 850 m de subidas, os mesmos de baixadas       DIFICULTADE: Media 

DISTANCIA: 18 km             TIPO DE RUTA: Circular                                                        MAPA: I.G.N. – 188 – IV

COTA MÍNIMA: Rego do Batán (268 m)      COTA MÁXIMA: Preto a Chamoso (672 m)

SINOPSE: Esta interesante ruta comeza na Praza do Barquilleiro, podendo dividila en dous tramos dada a proximidade da Praza do Barquilleiro con Fondo de Vila permitindo diminuír o percorrido á metade.

O sendeiro transcorre maioritariamente por camiños de carro, entre coidados viñedos , centenarios soutos e fermosos miradoiros como é o Balcón de Madrid ou Balcón dos Mouros. Temos tamén o singular mosteiro románico de Santa Cristina de Ribas de Sil agochado no medio dun souto.

DESCRICIÓN DA RUTA: A ruta pode facerse en calquera dirección, escollendo nosoutros a que segue as agullas do reloxo.

Saímos da Praza do Barquilleiro (665 m) en dirección oeste camiñando uns metros pola estrada que vai a Castro para desviarnos por un camiño que sae pola dereita. Vamos en dirección norte paralelo ao regato Das Gavias entre bosque autóctono ata que damos un brusco xiro á esquerda para volver a atoparnos con a estrada anterior. Camiñamos por ela uns metros en dirección a Parada para abandonala pola súa marxe dereita entrando nun novo bosque autóctono no que se atopa a aldea abandonada de Chamoso (650 m). O camiño baixa ata atopar a estrada de novo que seguimos pero esta vez en dirección a Castro (620 m).

Atravesamos esta aldea en dirección norte, tendo na saída un cámping e o miradoiro de As Xariñas do Castro. O sendeiro, máis abaixo chega á estrada que baixa ao mosteiro de Santa Cristina de Ribas de Sil (430 m), que podemos visitar seguindo dita estrada. Volvemos os nosos pasos pola estrada ata o último punto que demos con ela e internámonos de novo no bosque en dirección suroeste para cruzar o regato Regueiral xa moi preto das augas do encoro de Santo Estevo.

O camiño xira bruscamente ao sur en dirección a Portela (550 m) que pasamos sen entrar nela. Cruzamos o regato do mesmo nome e xiramos de novo cara ao noroeste camiñando pouco nesa dirección porque de novo o sendeiro cambia de rumbo cara ao sur. Atravesamos agora o rego Das Gavias (540 m) con rumbo sur ata que collemos unha nova dirección, esta vez ao noroeste para pasar xunto a un campo de fútbol.

Xusto detrás deste campo, atópase o miradoiro Balcón de Madrid ou dos Mouros (640 m) que nos amosa unha fermosa vista sobre o Canón do Sil. Separado uns metros, máis adiante, temos outro miradoiro.

Rodeamos completamente o campo de fútbol para seguir uns metros pola estrada, abandonándoa axiña pola súa marxe esquerda. Volvemos a internarnos no bosque ata chegar a Fondo de Vila (640 m). Desde este lugar queda moi preto o punto de saída.

Pasamos xunto as primeiras casas do lugar para virar á esquerda e ir ao encontro dunha pista que ven do campo de fútbol pola que baixamos ata unha finca de viñedos. Cruzamos esta finca e baixamos ata o rego do Batán (250 m) o cal seguimos en dirección suroeste polo medio do monte. Pasamos por Etrambosríos (430 m) para subir ata a estrada que seguimos preto dela, deixándoa á dereita por carreiro que sobe lixeiramente ata o lugar de Sardela (660 m), lugar situado a un quilómetro do punto de partida en Parada de Sil.