050116 De Cabo Ortegal a S. Andrés de Teixido

 

De Cabo Ortegal a S. Andrés de Teixido

                                                                                       Enlaces a:  wikiloc  /  fotos  /  pdf castelán

SITUACIÓN: Cariño e Cedeira (A Coruña)

PUNTO DE PARTIDA: Cabo Ortegal

ACCESO: Dende a C – 642, a altura de Ponte Mera, hai que coller a estrada que vai a Cariño. Dende aquí seguimos a sinalización ata o Cabo Ortegal.

HORARIO: 5/6 horas             DESNIVEL: 600 m             DIFICULTADE: Baixa

TIPO DE ROTA: Travesía     MAPAS: I.G.N – 1 – III - IV

DESCRICIÓN DA ROTA: Dende a Punta dos Aguillóns no Cabo Ortegal, retrocedemos 750 m. pola estrada ata unha pista de terra, pola que subimos. Hai un paso para evitar a saída do gando. A pista vai subindo e a aldea de Vacariza vai quedando aos nosos pés para despois de dous quilómetros e medio chegar a unha pista asfaltada.

Camiñamos escasamente un quilómetro pola pista de asfalto onde hai dous miradoiros,un sobre a vila de Cariño e outro orientado cara ao interior da ría, con Espasante, Ladrido e Ortigueira no leste e a Serra da Capelada ao oeste.

Collemos a primeira pista que aparece a dereita e na segunda curva vamos cara a esquerda por un corta lumes, primeiro cara ao norte e logo cara ao oeste.

Despois de sete quilómetros de recorrido, chegamos á estrada que vai a San Andrés, pero nunha curva que se aproxima aos cantís, onde hai unha caseta do gando, ao pasala collemos unha pista a dereita que vai a beira do acantilado, e tan preto del como se queira podemos camiñar durante dous quilómetros para, salvando os arames, chegar a garita de Herbeira (s XVIII). Arredor dela hai un miradoiro sobre o cantil que nese punto, con 614 m. de altura, é o máis alto de Europa.

Seguindo ao oeste vaise baixando entre os cabalos que pacen libremente e o mar, xunto ao peche dos arames que nos leva ao camiño, marcado como rota, que pasa por riba dos prados da aldea de Teixedelo e sae á estrada xunto a un cruceiro que xa puidemos observar dende a garita. Dende aquí podemos ver o lugar de San Andrés de Teixido, e do outro lado, fronte a nós, o cruceiro dos Carrís. Volvendo a estrada, sen chegar a ela, á dereita baixa un camiño,as veces carreiro e outras canle, pouco usado polos peregrinos, que chega a un dos aparcadoiros que existen no lugar.

En San Andrés pódese visitar a capela e a fonte bebendo dos tres canos sen apoiarse. Temos tres centos metros por un carreiro que nos leva ata os cantís da beira do mar.