24 05 18 PICO TRES BISPOS
| PUNTO DE SAÍDA | TRAZADO DA RUTA | GALERÍA DE FOTOS | PDF CASTELÁN | MAPA PARA IMPRIMIR |
SITUACIÓN: Parque Natural de Ancares (Cervantes) Lugo
PUNTO DE PARTIDA: Albergue de Campa da Braña (1.360 m)
ACCESO: Desde a A – 6 na saída 451 coller a estrada que vai a Navia de Suarna LU – 722. Desviarse pola LU – P – 0702 que pasa por San Román e seguila ata A Degrada onde empalmamos coa LU – P – 1401 ata Campa da Braña. Alí collemos a estrada que sobe ao albergue que dista 1,5 km do cruce
HORARIO: 5/6 horas DESNIVEL: 820 m DISTANCIA: 18 km
DIFICULTADE: Media TIPO DE RUTA: Circular
COTA MÍNIMA: Río da Vara (1.160 m) COTA MÁXIMA: Tres Bispos (1.794 m)
MAPA: I.G.N. – 125 – II
SINOPSE: A comarca de Ancares, en Galicia, pertence aos concellos de Becerreá, As Nogais, Baralla, Cervantes, Navia de Suarna e Pedrafita do Cebreiro.
A cordilleira separa as provincias de Lugo e León estando o segmento máis alto no tramo de Pena Rubia ao porto de Ancares. O cume máis alto desta serra e o pico Cuíña (1.992 m) pero o máis rechamante é sen dúbida o pico Mostallar (1.880 m).
O nome de Golada úsase na toponimia local e significa un paso alto entre vales.
DESCRICIÓN DA RUTA: Saímos do aparcadoiro do albergue de Ancares en sentido ascendente pola ancha pista en dirección suroeste. Cando levamos un quilómetro camiñado, aparece unha bifurcación (1.420 m). Seguiremos o ramal da esquerda, o da dereita será o do regreso. Esta ancha pista vai polas abas do pico Fieiró sempre con moi bo firme e con pouca pendente, sendo este tramo, a parte menos interesante da ruta.
Pasamos pola Golada do Medio (1.493 m) onde xiramos lixeiramente á esquerda camiñando agora polas faldras do Pico dos Bois ata a Campa dos Tres Bispos (1.576 m). Aquí remata a cómoda pista para seguir por un carreiro que bordea un outeiro pola dereita para chegar á Campa das Ovellas (1.700 m).
Desde aquí comezamos a subida máis pendente que en pouco tempo nos leva ao cume Tres Bispos (1.794 m). Desde o cume vemos unha boa parte da cordilleira de Ancares. Cara ao nordeste vemos os Penedos de Donís, o Corno Maldito, Pico Lagos, Pico das Charcas, Pico Lanza e Mostallar. Se o día é claro, incluso podemos ver o macizo de Peña Ubiña e Picos de Europa. Cara ao sur temos rechamante Pena Rubia, derradeiro cume de Ancares polos sur.
Desandamos o camiño ata a Campa das Ovellas onde collemos un carreiro en dirección sur leste, sen case desnivel no primeiro tramo e logo dun pequeno descenso chegamos ao Alto da Trapa (1.663 m). Agora camiñamos polo alto do cordal que separa as provincias de Lugo e León ata a Golada da Trapa (1.586 m).
Aquí xiramos á dereita en dirección oeste para internarnos no bosque cara as campeiras de Brego. O carreiro pasa á esquerda do refuxio para seguir de fronte ata o pequeno cimbro da Golada da Vara (1.467 m).
Comezamos a baixar polo camiño entre carballos e moitos acivros para chegar ao punto máis baixo da ruta, un cruce onde á esquerda temos o rego da Vara e unha ponte de madeira que non temos que cruzar.
O noso andar segue o camiño principal onde comeza a subida. Primeiro aparece a ruína dunha casa á nosa dereita é un pouco máis adiante, despois dunha curva temos as ruínas doutra casa á esquerda. Este lugar é coñecido como Cabana Vella.
O camiño segue gañando altura polo medio do fermoso monte, pasamos un pequeno estanque e unhas columnas de pedra para chegar á bifurcación onde seguimos á esquerda pola cómoda pista que transitamos na saída.
Así remata esta fácil camiñada de novo no albergue de Ancares.