23 09 16 LA MOLINUCA - PICA DE PEÑAMELLERA - ALLES

 

PUNTO DE SAÍDA TRAZADO DA RUTA GALERÍA DE FOTOS PDF CASTELÁN MAPA PARA IMPRIMIR

 

 

SITUACIÓN: Peñamellera Baja e Peñamellera Alta (Asturias)

PUNTO DE PARTIDA: La Molinuca (60 m)

ACCESO: Pola estrada AS – 114 que une Panes con Arenas de Cabrales

HORARIO: 5/6 horas                     DESNIVEL:  680 m             DISTANCIA: 14 km

DIFICULTADE: Media                   TIPO DE RUTA: Travesía

COTA MÍNIMA: La Molinuca (60 m)       COTA MÁXIMA: Braña Bondi (500 m)

MAPAS: I.G.N. – 56 – II – 32 – IV

 

DESCRICIÓN DA RUTA: Comezamos a andaina á altura do restaurante de La Molinuca, cruzando a estrada primeiro e logo o río Cares por unha ponte colgante.

            Primeiro en suave subida chegamos ao lugar de La Serna pasando xunto á ermida da Virxe do Pilar. Xiramos á dereita primeiro e de seguida á esquerda para seguir a pista que  nos leva a Bores (220 m). Desde este lugar, xa podemos ver preto a aldea de Bores e por riba, a impoñente Pica de Peñamellera.

            Entroncamos con a pista asfaltada onde collemos á dereita, pasamos xunto á capela de Santa Catalina e seguimos de fronte cara ao núcleo de Orejuz (240 m) o cal cruzamos, para trocar, logo de pasar as derradeiras casas o asfalto por formigón.

            A pista segue subindo ata unha curva á dereita onde collemos de fronte por un ramal secundario. Neste punto, seguindo pola dereita, vaise cara á Pica de Peñamellera. A pista segue entre monte e prados con cabanas deixando sempre a Pica de Peñamellera á dereita. O camiño chega a Vallejo de los Prados (440 m) onde nunha curva, sae pola esquerda un camiño que vai á mina de Argayón pero, seguimos pola dereita subindo cara á Braña Bondi (500 m), punto máis alto da ruta, para logo baixar lixeiramente ata o Collado de Serna (430 m).

            Desde este paso, o camiño todo en baixada chega a Mier (100 m) onde abandonamos a pista de formigón collendo á dereita para seguir por un carreiro que vai pola beira dereita do río ata a ponte colgante de Niserias pola cal cruzamos, primeiro o río e logo a estrada onde, enfronte á Casa Julián, collemos a estrada asfaltada AS – 345 dirección Alles, aproximadamente un quilómetro ata que collemos o desvío cara a Besnes onde a pista sobe entre soutos de castiñeiros, avelaneiras e carballos pola beira do río Besnes ata chegar a Alles (280 m) onde rematamos a camiñada.

           

            Pica de Peñamellera (764 m)

 

            Para subir á Pica de Peñamellera, logo de pasar a aldea de Orejuz, collemos unha pista á dereita que sobe ata Huerto Collado (496 m), onde collemos un carreiro que sae pola dereita que cruza un prado e pasa por xunto a unha rea de avelaneiras logo dos cales saímos a unha pedreira. Os fitos lévannos ata o comezo da subida onde teremos que facer uso das mans en varias ocasións ata chegar ao cume desta montaña.